A terra sta murennu (Gaspare Cucinella)

A TERRA STA MURENNU

 

A terra sta murennu.

Chi sensu avi a vita

senz’aria salutiva,

senz’acqua ri surgiva,

 

senza volu ri farfalli,

senza ciuri profumati?

sulu terri ncimintati

e cristiani disastrati

 

Ci su omini balordi,

hannu i retini nn’e manu,

guvirnannu malamenti

si nni futtinu r’a genti

 

Allordanu u munnu,

nvilienanu u mari,

nn’o cielu un c’è culuri

nun si po’ rispirari

 

Cavadduna d’acqua

Acchiananu d’u mari:

scumparinu casi e cristiani,

nuddu si po’ sarbari

 

Pitroliu, tecnologia

nun vonnu diri amuri.

Ammazzanu a natura

e portanu duluri

 

A terra grira e muori

Tu nenti ci puoi fari

Crastuna e babbaluci

un li puoi chiù truvari

 

Nun basta chiù grirari,

na cosa si può fari

lassamu stari i machini:

a peri, a caminari

 

 Gaspare Cucinella