Chistu è u mumentu (Gaspare Cucinella)

CHISTU E’ U MUMENTU

 

Arriva u mumentu

ri fari piazza pulita r’i privilegiati

e di chiddi chi annu i spaddi guardati.

Rispettu, firucia, dignità,

paruoli strani addiventanu

nn’a testa ri cu teni u putiri.

Rinari, ricchizzi, illegalità,

sunnu chiù forti ri l’onestà.

Sempri a stessa musica, musica stunata,

strumenti vecchi, arrancirusi.

Iorna difficili ni fannu campari.

Ora n’autra pagina s’affaccia

comu na bannera chi svintulia

e nun sta ferma contru a lurdia.

Tutti i cosi fitusi spuntanu.

Vonnu puru puliziari.

Mumentu ca nun è tempu di cugghiuniari:

senza guvernu, disperazioni, disoccupazioni,

senza spiranza, burdellu, confusioni.

Ci sunnu sempri i privilegiati

Ca runanu, prumettinu

C’è sulu a prumisa ri la riprisa.

 

10.3.2013