Lu curaggiu di Peppino
Picciuteddu curaggiusu,
nun ci pinzasti du voti a rinnegari
tò patri e a mettiti contru ogni mafiusu.
N’te purmuna rispiravi aria di canciamentu
ma lu cori tou era chinu di sgumentu
quannu virivi l’aria e li gesti di certa genti
‘nca s’annacavanu e cumannavanu n’to paisi
senza ca nuddu ci dicia nenti.
Radio Aut era la tò vuci
eranu tanti li cinisara ‘nca t’attintavanu,
n’zutta n’zutta t’apprezzavanu
ma o contrariu di tia nun parravanu
picchì da mafia si scantavanu.
Lu patruni di Cinisi “Tano seduto” lu chiamavi,
pì gghiri n’ta la sò casa centu passi tu cuntavi,
su “Onda Pazza” tu griravi,
sfuttennu senza scantu e nè timuri
politici, mafiosi, sinnaci e commendaturi.
Li tò pinsati accuminciaru a esseri periculusi,
li tò denunci pì na pocu eranu fastidiusi,
e fù accussi ‘nca lu novi maggiu du settant’ottu
lu corpu tou marturiatu
n’capu i binari da stazione fu truvatu
e un suicidiu fu ammintatu.
N’to cori di to matri Felicia nà ferita mortali si rapiu,
idda nun si rava paci, a lu suicidiu nun criria,
pi dariti giustizia tanti anni luttau cù dignità
p’iccari n’terra ddu muru d’omertà
e fari canusciri a tutti la veru verità.
Peppì, chi vergogna pi nuatri siciliani,
pì chiddu ca’ ti ficiru stì malviventi,
nuddu si facia avanti, nuddu sapia nenti.
Lu tempu passa e ogni annu lu novi maggiu,
tanta genti veni a Cinisi pi ricurdari lu tò messaggiu
portutu avanti di tia cu tantu curaggiu.
Ma picchi a’ chiamano Cosa Nostra?
A’ mafia nun è cosa mia,
a mafia nun è cosa di tanti siciliani
‘nca travagghianu onestamenti,
e vonnu essiri liberi di sta mala menti.
La Sicilia nun è sulu terra di mafia,
idda è terra di suli, di mari, di aria pulita e di bravi genti.
Giuseppe Billeci (Borgetto)
