Guvirnanti truffaldini

 

 

Guvirnanti truffaldini,

v’arraffastivu li sordi,

l’ammucciastivu a li banchi,

v’arristaru i manu lordi.

 

Quantu sunnu li dinari?

Su miliuna di miliardi

Nun ci bastanu dieci anni

Si vulemuli cuntari.

 

E lu populu ‘nculatu

Tutti i cunti avi a pagari,

tassi e tassi, sempri tassi,

i travagghi sunnu scarsi.

 

I pirtusa sunnu tanti,

mai si ponnu cummigghiari.

Ogni ghiornu c’è un cravunchiu

Ca s’avissi a scripintari.

 

Ogni ghiornu c’è un pirtusu

Chi s’avissi a cummigghiari,

iu mi sentu assai cunfusu,

comu fazzu ora a campari?

 

Sì, m’accattu lu bigliettu

E mi fazzu un viaggiu a Spagna,

accussì iu mi divertu

e mi manciu la lasagna.

 

Manciu, vivu, mi nni futtu,

spennu e spannu quantu vogghiu,

si mi resta u culu ruttu

è picchi finisci l’ogghiu.

 

Quannu unn’aiu poi cchiù na lira

e i sacchetti sunnu asciutti

m’arridduciu peddi e ossa

e cchiù nienti mi nni futti,

 

accussì unn’aiu nienti ‘i fari,

nienti pozzu dichiarari,

e s’insistinu a parrari

mi la ponnu pirsucari:

 

Io dichiaru i me cugghiuna

chi su tutta a me’ furtuna:

sugnu puvireddu ncanna,

itivinni a nn’autra banna.

(Gaspare Cucinella)